ગુજરાતમાં તાજેતરમાં આવેલી 88 PIની બદલીને વચ્ચે બે પોલીસ ઇન્સ્પેક્ટરની બદલી ઉડીને આંખે વળગે તેવી છે કારણ કે તેમાં સૌથી મહત્વની બદલી સોલા પોલીસ સ્ટેશનના પૂર્વ પોલીસ ઇન્સ્પેક્ટર જે પી જાડેજાની છે. જેઓ અગાઉ વિવાદમાં આવી ચૂક્યા છે જેના કારણે તેમને તાત્કાલિક બદલીને પહેલા PCBનો ઓર્ડર થયો પણ તે રદ કરીને તેમને કોર્ટ ડ્યુટી આપવામાં આવી. જેમ તેમ કરીને આવેલી બદલીમાં તેમને ACBમાં મૂકવામાં આવ્યા. પરંતુ ગણતરીના કલાકોમાં એવું તો શું થયું કે તેમને તાત્કાલિક ખસેડીને કરાઈ મૂકી દેવામાં આવ્યા છે.જે પી જાડેજાની બદલીના કારણે પોલીસ બેડામાં અનેક ચર્ચાઓ છે. જ્યારે તેમની સાથે જોડાયેલા વિવાદો પણ અલગ અલગ રીતે ચર્ચામાં છે.

તાજેતરમાં ગુજરાતમાં એક સાથે 88 પોલીસ ઇન્સ્પેક્ટરની બદલી આવી હતી. 26 તારીખે થયેલા ઓર્ડરમાં અમદાવાદ શહેરના પોલીસ ઇન્સ્પેક્ટરોનો પણ સમાવેશ થાય છે. જેમાં અમદાવાદ શહેરમાં સોલા વિસ્તારમાં ફરજ બજાવી ચૂકેલા જે.પી જાડેજાની બદલીનો ઓર્ડર હતો.જે.પી જાડેજા સોલા પોલીસ સ્ટેશનમાં ફરજ બજાવતા હતા. આ દરમિયાન રાજકીય કારણસર તેમની બદલી કરવામાં આવી હતી તેવું સૂત્રો પાસેથી જાણવા મળ્યું હતું. એક સમયે પોલીસ કમિશ્નરના ખાસ ગણાતા જે.પી જાડેજાને સોલાથી હટાવીને PCBનો ઓર્ડર કરવામાં આવ્યો હતો પણ ગણતરીના કલાકોમાં તેને રદ કરીને તેમને કોર્ટ ડ્યુટીમાં મૂકવામાં આવ્યા હતા. છેલ્લા ઘણા સમયથી તેઓ કોર્ટ ડ્યુટી કરી રહ્યા હતા.